Fjöldi stórborga hafa innleitt hjólaleigukerfi fyrir almenning og setja þau hjól sterkan svip á borgir eins og London og París. Hinn heimsfrægi hönnuður Philippe Starck var fenginn til samstarfs þegar hanna átti nýtt hjól fyrir fyrirhugað almenningshjólakerfi Bordeaux í Frakklandi.

Útkoman var óvenjulegt reiðhjól sem einnig má nota sem hlaupahjól þegar þarf að fara hægt yfir svo sem í göngugötum. Það er einnig með innbyggðum bögglabera, rafal í nafi fyrir ljósabúnað og gul dekk í yfirstærð gefa hjólinu skemmtilegt yfirbragð.

Yfirleitt snýr öryggisbúnaður í bílum að því að hlífa bílstjóra og farþegum en minna hefur verið hugað að þeim sem verða hugsanlega fyrir bílunum. Nýlega kynnti Volvo nýjan öryggisbúnað sem á að skynja hjólreiðamenn sem gætu verið í bráðri hættu á að verða fyrir bílnum. Við þær aðstæður tekur búnaðurinn fram fyrir hendur bílstjórans og bremsar sjálfkrafa til að reyna að forða ákeyrslu. Svipaður búnaður var fyrst kynntur hjá Volvo 2010 en nú er hann orðinn enn nákvæmari. Áður hafa verið kynntir utanáliggjandi loftpúðar sem einnig er ætlað að draga úr alvarleika slysa ef ekið er á gangandi eða hjólandi.

19.09.2012. Í dag klukkan þrjú verður ný hjólaþrautabraut opnuð í Öskjuhlíð. Um er að ræða ,,pumpu-braut“ (,,Pump Track“) sem farin er með sérstakri tækni og notuð til þjálfunar og leikja. Félagar í hjólreiðafélaginu Tindi eiga heiðurinn af lagningu brautarinnar og hafa unnið hana í samvinnu við Reykjavíkurborg sem leggur til svæðið. Opnun brautarinnar liður í dagskrá Samgönguviku sem nú stendur yfir. Brautin er staðsett við Nauthólsveg norðan við Háskólann í Reykjavík.

Ánæguleg frétt af vef Menntaskólans í Kópavogi:

Nú, þegar nemendur og kennarar njóta flestir sumarfrísins og liggja sjálfsagt margir sólbrenndir við ókunna strönd, er enn nokkur starfsemi í gangi í MK. Undirbúningur fyrir haustið er þegar hafinn og má sem dæmi nefna að settar hafa verið upp hjólagrindur umhverfis skólann. Þessi breyting er í anda hugmyndarinnar um að MK sé heilsuskóli og ætti að auka öryggistilfinningu og ánægju allra þeirra sem kjósa hjólreiðar fram yfir bílinn.

Ef þið viljið stíga græna skrefið alla leið er hér frumleg hugmynd að grasagarði á hjólið. Loksins eru líka not fyrir gömlu hálfónýtu sokkana sem stundum safnast upp hjá fólki.

Lesið bloggfærslur hennar Meghan þar sem hún fer yfir reynslu sína: 2010 bloggaði hún um grænu hjólabyltinguna og 2011 um hjóla-sokkagarðinn. Kannski hentar tempraða veðrið á Íslandi vel til að rækta sinn garð á hjólinu.

Hér er stutt skemmtilegt myndband af ferðalagi Luke litla úr leikskólanum sínum í Belgíu og heim. Það sést vel hversu vel hann skemmtir sér á leiðinni.

Bike Fixtation framleiða þessa hjóla-viðgerða-sjálfsala. Sjálfsalinn geymir algenga varahluti, hjólinu er komið fyrir í standinum sem inniheldur helstu verkfæri og svo er auðvelt að stilla þýstinginn í dekkjunum með rafmagnspumpunni.

Gæti ekki verið gott að hafa aðgang að svona græjum t.d. á Hlemm og slíkum stöðum?