Samhliða fjölgun hjólreiðafólks undanfarinna ára hefur þörfin fyrir sátt og samlyndi ólíkra hópa í umferðinni aldrei verið brýnni. Hugmyndin að sáttmála hjólreiðafólks og atvinnubílstjóra kviknaði kjölfar kynningar Maríu Agnar Guðmundsdóttur hjólreiðakonu og Svavars Svavarssonar ökukennara um gagnkvæman skilning á ráðstefnu Hjólafærni og LHM, Hjólað til framtíðar, sem haldin var á Seltjarnarnesi í september 2018.
Sáttmálinn innheldur góð ráð bæði til hjólreiðafólks og atvinnubílstjóra. Hann var gerður í samvinnu Samgöngustofu, Hjólafærni, Vegagerðarinnar, Eflu verkfræðistofu, Hjólaþjálfun (María Ögn), Landsamtaka hjólreiðamanna, Strætó, Lögreglunnar á höfuðborgarsvæðinu og Reykjavíkurborgar og Siggi danski atvinnubílstjóri kom einnig að undirbúningi hans. Fulltrúi Landssamtaka hjólreiðamanna í þessu verkefni var Birgir Birgisson.
Samgöngustofa útbjó lítinn bækling með sáttmálanum.
Sáttmáli atvinnubílstjóra og hjólandi vegfarenda
Við erum til fyrirmyndar í umferðinni með því að
- fara eftir umferðarlögum
- sýna ábyrgð og tillitssemi
- virða mikilvægi samvinnu
- virða sérstöðu hjólandi annarsvegar og þungra bíla hinsvegar
Atvinnubílstjórinn
- leitar eftir augnsambandi við hjólandi vegfaranda
- er meðvitaður um þau svæði sem hann ekki sér „blinda svæðið“
- sýnir hjólandi sérstaka varúð í hægri beygjum
- áttar sig á að hjólandi vegfarendur þvera akbrautir úr báðum áttum
- heldur 1,5 m fjarlægð frá hjólandi vegfaranda á akbraut
- veit að stórt ökutæki getur virkað ógnandi á hjólandi vegfaranda
- notar bílflautu í vinsamlegum tilgangi
- sýnir ávallt varúð óháð forgangi
Hjólreiðamaðurinn
- leitar eftir augnsambandi við bílstjórann
- er meðvitaður um skert sjónsvið bílstjórans, þ.e. „blinda svæðið“
- tryggir að ökumaður sjái til hans þar sem götur og stígar skarast
- er meðvitaður um varasamar hægri beygjur á gatnamótum
- beitir notkun víkjandi og ríkjandi stöðu við réttar aðstæður
- notar reiðhjólaljós til að auka sýnileika
- kynnir sér öruggustu leiðina miðað við aðstæður
- sýnir skilning á sérstöðu stórra ökutækja
- sýnir ávallt varúð óháð forgangi
