Í dag var sagt frá því að Reykjavíkurborg hefur samþykkt að efla hjólreiðar með margvíslegum aðgerðum á næstu árum sem hluti af grænu skrefunum.Á vef borgarinnar segir :
Fimmföldun á hjólaleiðum í Reykjavík á næstu fimm árum, tíföldun á næstu tíu árum, hraðbraut fyrir hjól milli Laugardals og miðborgar og brú yfir Elliðaárósa – eingöngu fyrir gangandi og hjólandi. Þetta er meðal þess sem fram kemur í fyrstu hjólreiðaáætlun Reykjavíkurborgar sem samþykkt var nýlega í umhverfis- og samgönguráði.
Borgarstjórn samþykkti í september 2007 að vinna ætti sérstaka hjólreiðaáætlun fyrir Reykjavík til að gera hjólreiðar að fullgildum og viðurkenndum samgöngumáta fyrir Reykvíkinga. Vinnuhópur meiri- og minnihluta vann að áætluninni í samráði við hagsmunaaðila og fagfólk. Markmiðið var að móta heildarsýn og aðgerðaáætlun til framtíðar um hjólreiðar í Reykjavík.
Leitað var til Landssamtaka hjólreiðamanna við gerð áætluninnar, og tekið var tillit til margra athugasemda okkar en kannski ekki allra. Fjöllum nánar um það á næstu dögum þegar við sjáum endanlega skjalið en á vef borgarinnar eru aðeins drögin ennþá. En í aðalaatriðum erum við hjá LHM mjög ánægð með þetta skref og bindum vonir við efndir í takti við þá stefnu sem þarna er sett fram.
Skýrsla umhverfisráðuneytisins um aðgerðir til að draga úr útblæstri gróðurhúsalofttegunda tiltekur eflingu hjólreiða sem eina áhrifaríkustu leiðina tengda samgöngum í þeirri baráttu sem ætti að þýsta enn frekar á yfirvöld að standa við stóru orðin.
Tengill í frétt á vef borgarinnar
