7. apríl Umferðarlagafrumvarpið.
Unnið hefur verið að endurskoðun á umferðarlögum undanfarinn áratug og voru ný frumvarpsdrög í umsagnarferli nýlega. Í ferðinni 7. apríl ætlum við að taka léttan snúning á frumvarpinu og hjóla eftir ákvæðum frumvarpsdraganna og skoða hvernig þau reynast hjólandi.
14. apríl Bílastæðahús.
Oft er kvartað yfir skorti á bílastæðum í miðborginni. Laugardaginn 14. apríl ætlum við að skoða þennan skort í bílastæðahúsum borgarinnar og einnig að skoða hvernig búið er að okkar kæru reiðskjótum, hjólhestunum.
21. apríl Þrengdar norður suður götur í Reykjavík.
Mikið hefur verið rætt og ritað um þrengingu Grensásvegar. Grensásvegur er ein af þeim götum i norður-suður stefnu í Reykjavík sem hafa verið þrengdar undanfarna tvo áratugi, í því skyni að auka umferðaröryggi fyrir börn og aðra íbúa í hverfunum. Laugardaginn 21. apríl ætlum við að skoða þessar götur sem hafa verið þrengdar og pæla í þeim lausnum sem hafa verið hannaðar til að draga úr umferðarhraða og auka umferðaröryggi. Hvernig reynast þessar lausnir fyrir mismunandi samgöngumáta?
28. apríl Óvissuferð.
Í síðustu laugardagsferð vetrarins 28. apríl ætlum við að hjóla út í óvissuna og sjá hvað bíður okkar við enda regnbogans.
Við bjóðum alla velkomna í ferðirnar.
