Fimmtudagskvöld þann 19. ágúst mun Hans Heiðar Tryggvason arkítekt, verkefnisstjóri hjá Umhverfis- og samgöngusviði Reykjavíkurborgar, kynna tímabundinn hjólreiðastíg á Hverfisgötu sem tekinn verður í notkun föstudaginn 20. ágúst. Umhverfis- og samgönguráð samþykkti á fundi sínum í síðustu viku að hleypa þessu tilraunaverkefni af stað til að efla mannlíf í miðborginni og hvetja til aukinna hjólreiða. „Markmið tilraunarinnar er að vekja athygli á Hverfisgötu, möguleikum hennar og sérstöðu og gera hjólreiðar að fullgildum samgöngumáta á þessari leið“ segir Hans. 35 gjaldskyld bílastæði á Hverfisgötu verða helguð hjólreiðum í þessari tilraun. Tilraunin stendur frá föstudeginum 20. ágúst og út septembermánuð.
Framkvæmdin felst í því að bílastæðin sunnanmegin í götunni verða fjarlægð og máluð "hjólarein" upp Hverfisgötuna í austurátt en niður Hverfisgötuna í vesturátt verða málaðar hjólavísa merkingar á akreinina.
Kynningin hefst kl. 21 fimmtudaginn 19. ágúst í klúbbhúsi Fjallahjólaklúbbsins á Brekkustíg 2. Daginn eftir er fyrirhugað að opna fyrir umferð um Hverfisgötuna.
Landssamtök hjólreiðamanna buðu Reykjavíkurborg að kynna framkvæmdina fyrir hjólreiðamönnum og eru þeir hvattir til að mæta.
Árni Davíðsson formaður Landssamtaka hjólreiðamanna
Sjá líka frétt á vef Landssamtakanna
