Hjólaklúbbur Loft Hostel, Bankastræti 7, 4.hæð
Hjólaklúbburinn er samstarfsverkefni Hjólafærni á Íslandi, Landssamtaka hjólreiðamanna, Farfuglaheimilisins Loft sem hýsir klúbbinn og Bike Company-sins (www.lofthostel.is, www.bikecompany.is)
Allir velkomnir á einstaka viðburði eða alla! Til baka á aðra viðburði
Mánudagurinn 16. sept, kl. 20: Hjólað í þjóðgörðum á Íslandi – almannaréttur, landverðir og ferðamenn.
Á degi íslenskrar náttúru verður þema hjólaklúbbsins hjólreiðar í náttúru íslands, með sérstakri áherslu á friðuð svæði, svo sem þjóðgarða. Í gegnum tíðina hafa komið fram ólík sjónarmið um hversu velkomin reiðhjól séu í íslenzkri náttúru, og virðist gæta nokkurrar tvöfeldni í stefnu stjórnvalda þegar kemur að málaflokknum. Hjólreiðamenn eru í auknum mæli að halda inn á svæði þar sem göngumenn hafa verið nokkuð einráðir áður og getur slíkt valdið pirringi í röðum þeirra sem telja svæðin sín, hvort heldur sem er í röðum göngumanna eða þjóðgarðs- og landvarða. Þá virðist gæta meðal margra ranghugmyndir um hvað hjólreiðamenn vilja og geta þegar kemur að tæknilega erfiðari leiðum. Á fundinn mun mæta fulltrúi úr langstærsta þjóðgarði landsins, Vatnajökulsþjóðgarði og von er á fulltrúa frá Umhverfisstofnun.
Þriðjudagurinn 17. sept, kl. 20: Hjólreiðar og strætisvagnar, samvinna strætó og hjólandi umferðar.
Hvernig er samspil strætisvagna og hjólreiðamanna? Er raunhæfur kostur að taka reiðhjól með sér í strætó? Ætti að koma upp yfirbyggðum hjólreiðastæðum við helstu strætisvagnamiðstöðvar eins og við þekkjum við lestar- og samgöngumiðstöðvar nágrannalandanna? Hver er reynsla þeirra sem hafa reynt samtvinnun strætisvagna og reiðhjóla við daglegar samgöngur? Eru strætisvagnar hættulegir reiðhjólamönnum sem stórir bílar á þröngum götum? Eru reiðhjól í augum strætó pirrandi samkeppnisfararmáti sem þvælist fyrir vögnum og kemur í veg fyrir að fleiri bíllausir taki strætó og byggi þannig upp öflugra strætisvagnakerfi á höfuðborgarsvæðinu eða bandamenn? Á fundinn munu mæta fulltrúar frá Strætó sem munu segja frá framtíðarsýn fyrirtækisins og vonandi fullt af fólki sem getur miðlað af reynslu sinni.
Miðvikudagurinn 18. sept: Hjólaferðaþjónustan býður gesti velkomna, Bike Companíið.
Fimmtudagurinn 19. sept: Hjólum um borgina, upphitun fyrir ráðstefnuna. Sjá nánar aðeins neðar.
Föstudagurinn 20. sept: Hjólum til framtíðar. Hátíðarkvöldverður á Engjavegi 6. Enginn formlegur hjólaklúbbur á Loftinu. Sjá nánar aðeins neðar.
Laugardagurinn 21. sept: Hjólað frá Hlemmi kl. 10 um morguninn. Endað á Loftinu í kaffi og rúnstykki í hádeginu ca. 11:30 til 13. Allir velkomnir, engin skráning.
Sunnudagur 22. sept: Hjólabíó og popp
Nánari tímasetningar síðar – dagskrá birt með fyrirvara um breytingar.
