Dagur B. Eggertsson, formaður borgarráðs og Hreinn Haraldsson vegamálastjóri opnuðu nýju hjóla- og gönguleiðina formlega. Verkefnið er hluti af sameiginlegu átaki Reykjavíkurborgar og Vegagerðar í gerð hjóla- og göngustíga, en fyrir ári síðan undirrituðu Dagur og Hreinn tímamótasamning þess efnis. Annað verkefni sem var hluti af því samkomulagi er hjólaleiðin meðfram Suðurlandsbraut og komu margir þátttakendur hjólandi þá leið frá Hlemmi.
„Hjólreiðar eru að stimpla sig inn sem alvöru valkostur í samgöngumálum í Reykjavík. Þessar nýju brýr eru frábærar fyrir Bryggjuhverfið, frábærar fyrir Grafarvog, frábærar fyrir Vogahverfið og frábærar fyrir Reykjavík. Þetta eru tímamót fyrir alla sem ganga,hlaupa, hjóla, njóta útivistar og hreyfa sig í borginni“, sagði Dagur í ávarpi sínu.
Það var vel viðeigandi að opna göngu- og hjólaleiðina nú í hinni árvissu Samgönguviku, en markmiðið með henni er að vekja til umhugsunar um ferðavenjur og fjölga þeim sem ganga, hjóla eða nota almenningssamgöngur. Nýja göngu- og hjólaleiðin var strax í morgun mikil hvatning til hjólreiða, göngu og hlaupa, eins og sjá mátti á þeim góða hópi sem mætti.
Mikil framkvæmd
Nýju göngu- og hjólabrýrnar byggja á vinningstillögu samkeppni sem Reykjavíkurborg og Vegagerðin efndu til í desember 2011 í samvinnu við félög arkitekta og verkfræðinga.
Burðarvirki brúnna vekur athygli en það er 18 metra hár þríhyrndur píramídi með skástögum í brúargólfið. Brúargólfin sem hanga í burðarvirkinu eru 36 metra löng með burðargrind úr stálbitum og holplötum með steyptu lagi. Við vesturkvíslina var sett landfylling til að stytta brúarhafið. Brýrnar eru 4,5 metra breiðar.
Auk brúnna var lagður göngu- og hjólastígur milli þeirra yfir norðurenda Geirsnefs, auk tenginga við núverandi stígakerfi. Stígarnir sem liggja að brúnum eru tvískiptir, annars vegar 3,0 metra breiður göngustígur og hins vegar 2,5 metra breiður hjólastígur með graseyju á milli.
Hönnunar og framkvæmdakostnaður var 250 milljónir króna og skiptist hann jafnt á milli Vegagerðar og Reykjavíkurborgar.
Tengdar fréttir:
• Ánægja með nýtt kennileiti á Geirsnefi
• Tímamótasamningur um átak í gerð hjólreiða- og göngustíga
Tengt efni:
• Tækniblað Umhverfis- og skipulagssviðs: Göngu og hjólabrýr yfir Elliðaárósa
• Upplýsingasíða í framkvæmdasjá: Göngu- og hjólabrýr yfir Elliðaárósa
Morgunblaðið fjallaði einnig um opnun brúnna í frétt.
Hér er Openstreetmap.org uppdráttur af tengingunni sem er teiknuð með grænum lit á kortið hér að neðan. Leiðin úr Grafarvogi niður í bæ styttist um 700 m aðra leið eða um tæpa 1,5 km fram og tilbaka.
Hópmynd hjá brúnum, sem er tekin í laugardagsferð frá Hlemmi í október núna í haust.
Mynd tekin af brúnum í desember 2013. Hjólreiðamaðaru geystist framhjá með góð ljós.
