Landssamtök hjólreiðamanna (LHM) hafa skoðað lýsingu fyrir gerð deiliskipulags fyrir Arnarnesveg. skipulagsgatt.is/issues/2025/717 (PDF)
Í undirbúningi er að gera deiliskipulög fyrir tvo vegkafla Arnarnesvegar. Annars vegar fyrir um 1,6 km kafla milli Hafnarfjarðarvegar og Reykjanesbrautar innan Garðabæjar og Kópavogs (mál nr. 660/2025), og hins vegar fyrir um 1,1 km kafla frá Fífuhvammsvegi að Rjúpnavegi innan Kópavogs (mál nr. 717/2025).
Deiliskipulögin tvö munu ná yfir veghelgunarsvæðin, stíga og gatnamót að nálægum íbúðarsvæðum. Unnið er að veghönnun beggja vegkaflanna með breytingum sem eru til þess ætlaðar að auka umferðaröryggi og um leið eru hljóðvarnir, stígatengingar og staðsetningar strætóstöðva yfirfarnar.
Bæði deiliskipulögin eru áfangar á þeirri vegferð að í gildi verði deiliskipulög fyrir Arnarnesveg innan Kópavogs og Garðabæjar.
Á vegkaflanum frá Fífuhvammsvegi að Rjúpnavegi er verið að endurhanna gatnamót til að auka umferðaröryggi og til að bæta umferðarflæði, en í dag er vegkaflinn tvíbreiður vegur með eina akrein í hvora átt með hringtorgi og tveimur T-gatnamótum. Til að ná því markmiði er til skoðunar að gera eftirfarandi breytingar:
Sjónarmið LHM.
LHM fer fram á að tillit verði tekið til eftirfarandi sjónarmiða við gerð deiliskipulagstillögu Arnarnesvegar frá Fífuhvammsvegi að Rjúpnavegi og frá Reykjanesbraut að Hafnarfjarðarvegi.
Samtenging stíga meðfram Arnarnesvegi
Helsti farartálminn á leið gangandi og hjólandi meðfram Arnarnesvegi er Reykjanesbraut og þarf í deiliskipulaginu að sýna með hvaða hætti á að leysa umferð gangandi og hjólandi yfir hana.
Við tvöföldun Arnarnesvegur á kaflanum frá Fífuhvammsvegi að Rjúpnavegi og milli Hafnarfjarðarvegar og Reykjanesbrautar er eðlilegt að huga að aðskilnaði umferðar gangandi og hjólandi með aðskildum stígum á þessum köflum og þá líka að uppfæra núverandi stíga miðað við hönnunarviðmið fyrir hjólreiðar. Ennfremur ætti að uppfæra kaflann milli Fífuhvammsvegar og Reykjanesbrautar á sama hátt svo og brúna yfir Hafnarfjarðarveg.
Hönnun fyrir hjólreiðar.
Stígar fyrir hjólandi eiga að vera beinir, greiðir og öruggir og hafa hagstæða hæðarlegu ef það er unnt. Sérstaklega er mikilvægt að tryggja öruggar og greiðar þveranir yfir götur og stofnbrautir.
Við hönnun hjólastíga og stofnstíga sem ætlaðar eru sem hluti af hjólasamgöngum þarf að fara eftir „HÖNNUNARLEIÐBEININGAR FYRIR HJÓLREIÐAR, Leiðbeiningar sveitarfélaga höfuðborgarsvæðisins og Vegagerðarinnar“ (19.12.2019 eða nýrri útgáfu). Samtökin óska eftir að fá tækifæri á seinni stigum til að rýna og senda inn athugasemdir ef við á, t.d. við deiliskipulag og verkhönnun.
Gróður og skjólmyndun
Leggja þarf áherslu á gróður til skjólmyndunar. Við stíga ætti að gera ráð fyrir gróðri og trjám sem draga úr vindi og skapa skjól án þess að hindra stígsýn við gatna- og stígamót. Trjá og runnagróður á betur heima á helgunarsvæðum stofnbrauta en grasflatir í þessu skyni.
Tenging stíga
Greiðar og öruggar tengingar ættu að vera frá stígum meðfram Arnarnesvegi við aðra stíga á leiðinni.
Merking leiða
Gera þarf ráð fyrir merkingu göngu- og hjólastíga með leiðarmerkjum og gerum við ráð fyrir að gerð verði grein fyrir þeim í verkhönnun.
Virðingarfyllst
f.h. stjórnar Landssamtaka hjólreiðamanna
Árni Davíðsson stjórnarmaður
Um Landssamtök hjólreiðamanna
Landssamtök hjólreiðamanna ( LHM) eru hagsmunasamtök sem hafa að markmiði m.a. að efla hjólreiðar á Íslandi sem heilsusamlegan lífsmáta og sem samgöngumáta. Öll helstu hjólreiðafélög landsins eiga aðild að LHM. Samtökin eru þó ekki aðeins málsvari félagsmanna hinna ýmsu hjólreiðafélaga sem telja yfir 2000 manns heldur eru þau jafnframt málsvari allra sem hjóla á Íslandi. LHM er aðildarfélag að European Cyclists' Federation, sem eru heildarsamtök fyrir hjólreiðafélög til samgangna og ferðalaga í Evrópu. Aðildarfélög ECF er að finna í flest öllum löndum Evrópu. LHM hlaut samgönguviðurkenningu Reykjavíkurborgar 2012 fyrir virka þátttöku og áhrif í að efla hjólreiðar á Íslandi.
