19.09.2012. Í dag klukkan þrjú verður ný hjólaþrautabraut opnuð í Öskjuhlíð. Um er að ræða ,,pumpu-braut“ (,,Pump Track“) sem farin er með sérstakri tækni og notuð til þjálfunar og leikja. Félagar í hjólreiðafélaginu Tindi eiga heiðurinn af lagningu brautarinnar og hafa unnið hana í samvinnu við Reykjavíkurborg sem leggur til svæðið. Opnun brautarinnar liður í dagskrá Samgönguviku sem nú stendur yfir. Brautin er staðsett við Nauthólsveg norðan við Háskólann í Reykjavík.
Fyrirmyndirnar að brautinni eru erlendar eins og nafnið Pump Track gefur til kynna, en útfærð af félögum í Tindi og hafa þeir veg og vanda að framkvæmd. Þeir hafa unnið hörðum höndum undanfarið við að móta brautina og þjappa undirlag. Vel hefur verið tekið á því eins og sést á myndunum sem teknar voru á sunnudag.
Hjólreiðafélagið Tindur var stofnað í febrúar 2011 með það að markmiði að fjölga þátttakendum í keppnishjólreiðum á Íslandi, sem og þeim greinum sem stundaðar eru hvort heldur það eru samgönguhjólreiðar, keppnishjólreiðar eða bara hjólreiðar til skemmtunar, eins og segir á vef félagsins. Tindur er löglegt íþróttafélag innan ÍSÍ og stendur öllum opið til þátttöku.
Hópmynd: David Robertsson,Jóhannes Bjarnason, Kári Halldórsson og Óskar Ómarsson
Uppruni: www.reykjavik.is
Fleiri myndir: Facebooksíða Reykjavíkurborgar
