Borgarfulltrúar Sjálfstæðisflokksins í Reykjavík segja að meirihlutinn í borginni, Besti flokkurinn og Samfylkingin, ætli aðeins að leggja 16% þeirra hjólastíga sem ákveðið hafði verið að leggja á árinu 2011.
Sjálfstæðismenn segja að samkvæmt aðgerðaáætlun um lagningu hjólreiðastíga, sem allir flokkar hafi samþykkt í maí í fyrra, hafi átt að leggja 10 kílómetra af hjólastígum á ári 2011, 2012 og 2013. Talað hafi verið um stórátak og allir flokkar hafi fagnað framtakinu.
Aðgerðaáætlunin byggðist á hjólreiðaáætlun Reykjavíkur sem nefnist Hjólaborgin Reykjavík og var samþykkt í borgarstjórn í janúar árið 2010.
Gísli Marteinn Baldursson og Hildur Sverrisdóttir, borgarfulltrúar Sjálfstæðisflokksins, segja að kúvending hafi orðið á stefnu borgarinnar í uppbyggingu Reykjavíkur sem hjólaborgar.
Þetta kemur fram í bókun á loknum fundi umhverfis- og samgönguráðs í gær.
Uppruni: http://mbl.is/frettir/innlent/2011/06/29/standi_ekki_vid_loford_um_hjolreidastiga
Sjá einnig blogfærlsu Gísla Marteins: http://www.gislimarteinn.is/?p=1026 og svar Karls Sigurðssonar formanns umhverfis- og samgönguráðs Reykjavíkur í frétt á DV: http://www.dv.is/frettir/2011/7/1/100-milljonir-ad-leggja-1-kilometra-hjolastig/
Hjólafólk líka svikið
Mörgum er í fersku minni hvernig meirihlutinn í Reykjavík skerti þjónustu strætó verulega síðastliðinn vetur, þrátt fyrir áform um að „auka og bæta leiðarkerfi Strætó“.
Í sömu samstarfsyfirlýsingu Besta flokksins og Samfylkingarinnar var því einnig lofað að hjólreiðafólk myndi njóta forgangs í umerðinni. Eðlilegt var að þetta skyldi sett inn í samstarfssamninginn, enda hafði Samfylkingin þá nýverið tekið þátt í að semja og samþykkja hjólaáætlun fyrir Reykjavík, sem fékk heitið Hjólaborgin Reykjavík og ég skrifaði til dæmis um hér. Hjólreiðaáætlunin var samþykkt í janúar 2010 og í maí það sama ár samþykktu allir flokkar sérstaka aðgerðaáætlun, þar sem ákveðið var að leggja 10 km af hjólreiðastígum á árunum 2011, 2012 og 2013.
Á fundi umhverfis- og samgönguráðs í gær kom hinsvegar fram að aðeins verða lagðir 1,6 km af hjólastígum á þessu ári, eða 16% þess sem samþykkt hafði verið af öllum flokkum fyrir aðeins 13 mánuðum. Ef meirihlutinn heldur sama dampi í lagningu hjólastíga verða þetta því 4,8 km á þremur árum, en ekki 30 km á þremur árum, eins og til stóð. Af því tilefni bókuðum við Hildur Sverrisdóttir eftirfarandi:
Kúvending virðist hafa orðið á stefnu borgarinnar í uppbyggingu Reykjavíkur sem hjólaborgar, eftir að meirihluti Samfylkingar og Besta flokksins tók við völdum. Áætlun hans um lagningu 1,6 km af hjólastígum á þessu ári er blaut tuska í andlit þeirra sem hjóla og trúað hafa á uppbyggingu Reykjavíkur sem framúrskarandi hjólaborgar.
Fyrir liðlega ári samþykktu allir flokkar í borgarstjórn að árlega skyldi 10 km af hjólastígum bætt við kerfið, næstu 3 árin.
Að auki samþykkti öll borgarstjórn í janúar á síðasta ári hjólaáætlunina Hjólaborgin Reykjavík, þar sem gert er ráð fyrir fimmföldun hjólastíga á næstu 5 árum og tíföldun á næstu 10 árum. Gott hefði verið ef Samfylkingin hefði strax þá látið vita að hún ætlaði ekki að fylgja henni eftir.
Ávinningur borgarinnar af stórauknum hjólreiðum er öllum ljós, en hann birtist bæði í beinhörðum sparnaði, bættri heilsu borgarbúa og betri borgarmynd. Það gerist hinvegar ekki sjálfkrafa, og stjórnmálamenn þurfa að hafa kraft og þor til að forgangsraða í þágu þess sem mestu skiptir.
Það er gjörsamlega óskiljanlegt af hverju meirihlutinn í Reykjavík gengur svo freklega gegn yfirlýstum stefnumálum sínum. Ég veit að innan meirihlutans er fólk sem trúir í einlægni á nýjar lausnir í samgöngu og skipulagsmálum borgarinnar, en ekki verður annað séð en að það fólk hafi orðið undir og gamaldags hugmyndafræði um uppbyggingu borga hafi orðið ofaná. Það á því miður eftir að skila sér í meiri umferð, meiri mengun og þar með lakari lífsgæðum borgarbúa.
100 milljónir að leggja 1 kílómetra hjólastíg
Karl Sigurðsson segir borgina ekki eiga fyrir hjólastígum
„Það er spurning hverra loforð við erum að svíkja,“ segir Karl Sigurðsson, formaður umhverfis- og samgönguráðs Reykjavíkur, þegar hann er spurður út í gagnrýni Gísla Marteins Baldurssonar borgarfulltrúa á að Reykjavík hafi ekki staðið við að leggja 10 kílómetra af reiðhjólastígum í ár, eins og borgin hafði ákveðið að gera. Borgarstjórn samþykkti í fyrra áætlun sem nefnist Hjólreiðaborgin Reykjavík og gengur út á að gera stórátak í lagningu reiðhjólastíga um borgina. Áætlunin hljóðar upp á að lagðir verði 10 kílómetrar í ár og næstu tvö ár, samtals 30 kílómetrar.
„Þetta var ákveðið áður en við tókum við. Eins og gengur þá eru allar ákvarðanir háðar fjármagni sem úr er að spila. Áður en við tókum við hefði okkur þótt afar raunhæft að ná þessu á þremur árum. Þegar maður sér hvernig staðan í borgarsjóði er, og hvaða niðurskurð þarf að leggja upp með, þá áttar maður sig á því að þetta mun ekki gerast án einhverrar aukinnar aðstoðar,“ segir Karl og vísar í alþjóðlegt verkefni sem nefnist Elena og felur í sér hagstæðar lánveitingar og styrki frá Evrópusambandinu til þess að auka hjólreiðar, safna lífrænum úrgangi til að búa til metangas og fleira. „Þetta er partur af stærri pakka sem við erum að vonast til að hjálpi okkur að klára þessa mjög metnaðarfullu áætlun, en það mun ekki gerast á þessu fyrsta ári. Við erum ekki búin að blása neitt af en við sjáum fram á tafir af því að við eigum ekki pening fyrir þessu,“ segir Karl.
Spurður hvort Reykjavíkurborg muni þá leggja einhverja nýja stíga í sumar svarar Karl: „Já, við erum með 160 milljóna króna fjárveitingu. Það fer í nýjan stíg sem verður lagður. Samkvæmt mati þeirra sem sjá um útfærsluna eftir að áætlunin var samþykkt, þá kostar hver kílómetri af reiðhjólastíg 100 milljónir. Þessi áætlun hljóðar því upp á 3 milljarða á 3 árum.“